Бизнинг саволимиз қуйидагича: Биз яшаб турган жойдан 20-25 км. масофада чўл қумлари бор. Шу қумларда кўллар ташкил этилиб, ушбу жойларга шаҳарлардан турли ахлат-нажосатлар канализатсия орқали келиб тўпланади. Кейинги пайтларда баъзи инсонлар шу сувларни қочириб, ўрнига шоли экишмоқда. Шоли эса, фақат шу ахлат сув (ранги ўрик шарбати сингари қора-қизил, ҳиди ўта бадбўй) билан охиригача парвариш топади.
1) Шундай ер ва сувларда етиштирилган шо­ли ва гуручларни истеъмол қилиш мумкинми?
2)    Шу ишлар билан мусулмон, хусусан, тақволи аҳли илмлар шуғуллансалар, дурустми?
Илтимосимиз:
Шу масалани ҳал этиб, «Зикр аҳлидан сўранг» рисоласида чоп эттирсангиз.
Олдиндан ташаккур айтиб, дуо ила бир гуруҳ марғилонлик фуқаролар номидан...

ЖАВОБ: Бисмиллаҳир Роҳманир Роҳийм
Албатта, тақво юзасидан бу ишни қилмаган маъқул.
Шу билан бирга, айтишимиз лозимки, фуқаҳолар:
«Нажас сувлар билан суғорилган мевалар ва ахлатхонада ўсган зироатлар дони макруҳ эмас», дейишган. («Туҳфатул Муҳтааж фий шарҳил Минҳааж»).
Чунки экинларга мазкур сув тўғридан-тўғри етиб бормайди. Балки, ерга сингиб, тозаланган ҳолда сувнинг асари етиб боради. Валлоҳу аълам.